الخطبة في حلب

" الخطبة " في حلب ... أعقد من أعقد اختراع !!!


الأم : من بيت شئاع لبيت رئاع .. ولا بيعجبها العجب ولا الصيام برجب !!!
الشب والبنت : بين مطرقة " العادات " وسندان " الانتظار"
لكل بلد أو منطقة أو مدينة عادات وتقاليد تميزه عن غيره ، وهذا هو الحال في عادات " الخطبة والجازة " ، لكن حلب تتميز خصوصاًُ بعادات وتقاليد للخطبة ليس لها مثيل في باقي المحافظات السورية ، وهذه العادات أوجدها التطورالمتسارع وخصوصية حلب كمدينة تعج بالتجار ورؤوس الأموال ، مما جعل الحصول على فتاة في حلب للخطبة من أعقد الأمور، وهذا التعقيد يزداد يوماً بعد يوم ، والمتضرر الوحيد هم الشباب والفتيات ، وفي السطور الآتية سنسرد لكم غيض من فيض مما يحدث في واقع المجتمع الحلبي .

المرحلة الأولى : موافقة الشب على فكرة الخطبة
تبدأ عادة حكايا الخطبة في حلب من حديث بين الشاب وأمه كالآتي :
الأم : لك ابني حاجة بقى فهمنا ، بيكفي بقى نطوطة من بنت لبنت ، اركوز بقى وخليني أخطبلك .
الأبن ( بعد سنوات قضاها يطبق هالبنت ويترك التانية ويروح للتالتة ) : هيك بدك يعني يوم ، خلص توكلي على الله وخطبيلنا ، بس ما برضى غير ببنت شقرة عيون خضر (زرق معللي ) طويلة رفيعة ، متل القمر ( طلبات تعجيزية مستحيل يلاقيهم هدول( .
الأم : ايها هلأ فرحتني ، ولك والله والله لأدرلك حلب يمين وشمال وشرق وغرب وآخدلك أكوس وحدة ، خلص لا تاكل هم

المرحلة الثانية : إخبارالعائلة وكل ما يلوذ بالأم بموضوع الخطبة لبدأ عملية البحث ..!!
وهنا تبدأ همة الأم وتتصل ببناتها المجوزات : لك بنتي دي قوام هيروا حالكم بدنا نخطبلوا لأخوكم .
البنات : لك يوم ما بكير عليه لسا عمروا 25 سنة .
الأم : لك بنتي لبين ما نلاقيلو بنت الحلال والله يوفقنا ما بنعرف شقد بيصير عمروا.
وهيك القصة تبدأ بنسج خطوطها في رحلة البحث عن تلك الأميرة شريكة المستقبل للابن الملك ، وهنا طبعاً الأم لا ترضى بأن تكون العروس إلا أحلى وأجمل من كل (عواريس الحارة وخاصة كنة سلفتها ) ، وتبدأ الأم بمسيرة البحث وصولاتها وجولاتها في رحلة قد لا تنتهي لسنوات ، ومن بيت لبيت ، ومن سوق لسوق ، ومن تلفون لموبايل ومن ....... إلى ........


المرحلة الثالثة : اتصال هاتفي بين أم العريس والأم يلي عندها بنات للخطبة
طبعاً وقبل ما تروح لبيت العروس ( الهدف ) لازم تخبر بالهاتف من الرقم يللي جابتوه من بنت احمى أخوها ، أو من جارتها يللي شافتلها عروس لقطة وهي عبتتسوق وأخدت رقم بيتهم ، أو من بنتها يللي شافت رفيقة رفيقتها وقت كانوا بالجامعة عبيتمشوا ، ويدور حديث كالآتي :
الأم : مرحبا أم محمد ، دلونا عليكم قال عندكم بنات للخطبة .
أم محمد : أهلين لك خيتو ، ميت السلامة.
الأم : لك خيتو أم محمد والله تعبنا ، قلت منشان هيك قبل ما نجي قليلي اش أوصافها بنتكم ، يعني والله نحنا فتلنا كتير وما عجبنا حدا ، لك تقولي الكويسات نفقوا بهالأيام .
أم محمد : انتو تفضولوا وانشالله بتلاقو طلبكم ، بس انتو من بيت مين ، واش بيشتغل ابنكم ؟
الأم : نحنا من بيت ( فلان ) ، وابنا اسم الله بيديرفلان شركة تبعيت أبوه وعندو بيت وسيارة يعني ما ناقصوا شي غير بنت حلال كويسة شقرة بيضا عيون خضر أو زرق عطلبوا.
أم محمد : وصلتو انشالله بتلاقو طلبكم عنا ، اتفضلوا يوم الخميس اللي جي ، لأنو بكرا وبعد بكرا ، في جماعة قبلكم جيين يشوفوا البنت ( مع أنو ما بيكون لا حدا جي ولا شي بس ميشان تفرجيهم انو بنتها كويسة وهيك هيك الخطابين عليها (
الأم : ايه أكيد الله ما بيكتب غيرالنصيب ، بس ما بيصحلكم متل ابنا ها.
أم محمد : ايه اهلا وسهلا فيكن .
مو رايحة غير عالبنت .. "حديث خاص " بين الأم وابنتها
هون بقى أم العروس بتبلش بتشد على ايد بنتها ميشان تحضرها ليشوفوها الخطابين .
أم العروس : لك بنتي قومي ، صارت الساعة وحدة الضهر ولسا ما فقتي ، قومي هيرلي حالك ، وحاج كسل، اش بدك الخلق يقولوا علينا يجوا يشوفوا عيونك منفخة ، قريضة بنات ، قومي هلئ اتصلوا جماعة بدهن يجوا يشوفوكي يوم الخميس الجي.
البنت : لك يوم ما خلصنا من الخطابين ، لسا جماعة ريحين وجماعة ريجعين ، والله تعبت ارحموني ، يعني كل يوم بدي أقوم حضر حالي وأتمكيج ولف شعري و...و ... ،
الأم ( مقاطعة ) : ايه اش لكان بدي أكبسك جنبي مخلل .
البنت ( تكمل ) : والله مليت ، طيب ماما على الأقل خليني خلص هالجامعة وبعدا ابقي استقبلي خطابين قد ما بدك.
الأم : لك لحقانة بنتي ، تخلصي الجامعة ولبين ما تخلصي منجوزك ، اش ما في عندي غيرك بنات !!! خليني دبرلك ابن الحلال يللي بدو يستتك ، ويعيشك عيشة حلوة ، وأنا ما برضالك غير أحلى من عيشتي ، لا تخافي لك بنتي أنا ما بعطيكي لمين ما كان إلا يكون ابن عيلة وابن نعمة ، وديرس ومتعلم وأحوالوا منيحة ويكون ... ويكون ...
البنت ( بينها وبين نفسها ) : ايه يكون ويكون ، أنا يللي بعرف امي لا بيعجبها العجب ولا الصيام برجب ، وأنا ما بقبل غير برفيقي حمودة يقبش عضامي ما يعرف انو جيينا خطابين لينجلط .


المرحلة الرابعة : أم الشب في سلسلة زيارتها لبيت العروس بعد خمس سنوات بحث عن عروس أوكلت المهمة لابنتها !!!
وهون لازم الأم تزور بيت البنت يللي بدها تخطبها عدة مرات ، مرة واحدة لا تكفي ، وكل ما بتدخل لبيت شي عروس بتكون سيحبة وراها بناتها أو خواتها ، في أول زيارة لها ، وفي حال عجبتها البنت ، يترجع تاني يوم جيبة معها جارتها أم عبدو وأختها التانية يللي كانت أول يوم مو فاضية ، وتالت يوم بتجيب معها كنتها ووو .. والزيارة الرابعة ( بيجوز تكون بعد كم شهر من الزيارة الأولى لانو بتكون زارت كم بيت تانيين ورجع قلب عقلها ) وهون بتجيب معها صديقات خبيرات ، وبيفحصوا البنت من فوق لتحت وكأنهم طبيبات ...
وهون بنذكر قصة حلوة جريت بحلب وفيكم تستخلصوها من الحوار الهاتفي :
* آلو مرحبا ..
أم البنت : أهلين .
* ما تواخذينا خيتو منشان الله ، انا عبتصل لأنو عنا أرقام كتير منشان الخطبة وهالرقم ما عبعرفوا لمين ، حضرتكم بيت مين ؟.
أم البنت : ولايهمك نحنا بيت ( فلان (
* ايه تشرفنا ، صبيتكم شقد عمرا ؟
أم البنت : عمرا 19 سنة ، ، ليش ابنكم شقد عمروا ؟
* الله يخليلكم ياها ويحرسلكم ياها ، ابني عمروا تسعا عشرين سنة ، وبدو بنت تكون كويسة حسن وجمال .
أم البنت : واش بيشتغل ؟
* بيشتغل بتجارة العبي ( العبي تعني العبايات التي يرتديها الفتايات والنساء ) ، عيونو خضر هالقد بوشو.
أم البنت : في عندو بيت ؟
* ايه أكيد عندو بيت بجمعية قرطبة كامل مكمل من العفش للجمجاية للأبرة .
أم البنت : لك مو انتو من بيت ( فلان ) وجيتو لعنا من شي شهرين ونص وما مشي الحال لأنو ابنكم كبيرعبنتنا .
* ليش انتو يلي بيتكم بشارع .... ، وبنتكم هي البيضا الشقرة الطويلة ، ووقتا ما قبلتو لانو ما بترضوا تطببوها على وشا ؟ ... ( تطب على وشا مصطلح حلبي يعني تضع الخمار على وجهها (
أم البنت : ايه صح ، وكمان ابنكم كبيرعبنتنا يعني في شي عشر سنين بيناتهم
* والله هو بدو وحدة حسن وجمال وتطب على وشا ، يعني والله العظيم البنت أحلى الشي فيها وشها تروح تدلقوعالشارع ، والله ما بيرضى هيك .. طيب ما تواخذيني ميشان الله ، وأنا اختو للشب مو أمو لأنو الماما وكلتني بهالمهمة بعد ما تعبت من هون لهون ومن هنيك لهون وما عبتلاقي بنت الحال يللي عطلبنا وصرلها أربع خمس سنين عهالحالة وما اندلينا عنصيبنا. كرمال الله ما تواخذيينا لانو ما كنت عيرفة هالرقم لمين .
أم البنت : عادي . الله يدلكم على نصيبكم .
أخت الشب : حسب الموانة دخيلك والله يجبر بخاطرك ، إذا في حواليكي بنات كويسات دقيلي وعطيني رقمهم ، رقمي وصارعندك .
أم البنت : اي انشالله تكرم عينك .
فقط في حلب ....أحدث طريقة لعرض الفتيات أمام الخطابات !!!
من كتر ما بيلاقو صعوبة بعض العائلات وخاصة يللي بيكونو بناتهم حلوات انو لازم يظبطو بناتهم على آخر طراز ويتمكيجوا ويتغندروا ولازم تطلع بنتهم ملكة أمام الخطابات فهذا مجهود يطفر منه بعض البنات وخاصة إذا كانوا " ظاظات " ( مصطلح ما حبيت اشرحو لانو شلون ما شرحتوا بيجوز ما تفهموه ) ، فوصلتني قصة ظريفة وطريفة رائعة ابتكرتها إحدى الأمهات لعرض بناتها أمام الخطابات ، صورتهم بواسطة كاميرا فيديو وهنن متمكيجين ومتغندرين ومجهزين حالهم على آخر طراز وفتلتهم قدام الكاميرا ، وصارت كل ما بيجي حدا بدو يخطب من بناتها تشغلهم الفيديو سيدي ...!!! ( صدقوا هذه قصة حقيقية جرت في حلب ... والله شيفين التطور وصل لهون ، والتكنولوجيا صار فيكم تستخدموها حتى في الخطبة ... احذروا التقليد !!! (
الأمهات " لا بيعجبهم العجب ولا الصيام برجب "
طبعاً وبعد هالمسيرة الطويلة ، ممكن يلاقو طلبهم وممكن لا التيسير من الله ، وإذا راحو على بيت شي وحدة ورفضوهم ، بيرجعوا بيقولوا ( البنت ما عجبتنا ... هي ما حلوة تمها كبير ) .. والتانية ( لك ما شفتوا شلون مشيتها ) .. و التالتة ( قصيرة و مكبسة ويمكن حيطة عدسات يبلاها بقتلها ) .. والرابعة ( في شي غلط بجسمها ..) ... والخامسة ( ما شفتوا شلون امها ضيربة بوزها للسما .. ما باخدا لو بيعطوني فوقها ملايين ) ... والسادسة ( عيونا صغار وأنفها كبير وادنيها مشنكلة .. متل القرد )...والسبطعش ( اجريها كبار وما بتعرف تحكي كلمتين على بعضون )... والتسع و تسعين ( ابني ما هيك طلبوا ( !!!! .
وأم البنت كمان إذا ما بدها تعطيهم البنت بتصير بتطالع ألف عذر وعذر (على هادا مو ديرس ) ، والتاني أحوالوا مي منيحة ، والتالت ( أصلع ما في براسو غير كم شعرة ) ، والرابع ( سمعنا انو من بنت فلان لبن تعلان ) والخامس ( أسمر .. ييي بدك ولاد بنتي يطلعوا سمران أو سود ) ، والسادس ( .... ) ...

المرحلة التسعو وتسيعن ... بدنا نسأل عنكم !!!
وفي حال عجبهم الشب ، بيقلولهم بالشرع والسنة لازم نسأل عنكم ، وهاد حقهم طبعاً يسألو ويسألوا ، وهون كمان تبدأ مسيرة جديدة وبحث عن تفاصيل ميشان يسألو عن عيلتو للشب بلكي طلعوا مو كويسين ، ومن سؤال لسؤال ، من الجيران لحتى رفيقو يللي كان يدرسو جنبو بالمقعد بالابتدائي ، ويا ويلو إذا طلع مزعوج منو لانو مخسرو شي مرة بلعبة شدة أو مازح معو شي مزحة ... وتحقيق طويل عريض أصعب من تحقيقات المباحث الجنائية .
وبنفس الوقت أهل الشب بيكونوا عبيسألو عن أهل البنت ، وسمعة البنت لازم تكون صافية متل ليرة الدهب ، وإذا سمعوا شي كلمة غلط ، شالو الفكرة من اساسها ، وهون ببلش لت وعجن النسوان ( معليشن إن كيدهن عظيم ) ... وفي حال ما مشي الحال بترجعوا بتبلشوا من المرحلة الأولى ... وما بنصحكم لأنو أنا دخت لبين ما وصلت بالمادة لهون .
كلمة أخيرة
ما ذكرناه سابقاً ( وحتى لا ينتقدنا البعض ) قد لا ينطبق على العديد من العائلات الحلبية التي تقتنع بالخطبة كأمر ديني وسنة ولا تكون هناك تعقيدات ، ولكن حين أردت تسليط الضوء على عادات الخطبة في حلب لأنني لمست تلك التعقيدات عند الكثير من شباب وفتيات حلب والكل يعزو هذه التعقيدات للأهل ، لذلك نتمنى من الأهالي أن ييسروا في خطبة أبنائهم وبناتهم ، فالله وحده هو متكفل بهم وبرزقهم ورزق أبنائهم وهناك أحاديث كثيرة لنبينا محمد (عليه الصلاة والسلام ) تحث على التيسير في موضوع الخطبة والزواج وعدم غلاء المهور والاختيارالزوج الصالح للفتاة قبل اختياره الفتاة الصالحة للرجل .

اي لا بهي بقلك اسمحلي
مو لهالدرجة
الوضع اكيد بسيط اكتر من هيك

ولا شو غاردينيا؟

يمكن كلامك صح الى حد كا بالريف يعني متل عنا
اما بالمدينة فأنا بأكدلك انو هالشي الى حد ما كتير صح

و ياستي ان شاء الله بتكون ابسط من هيك بلكي منلاقيلنا شي عروس بنت حلال

هههه تشكر بجو الحكي مزبوط عند الحلبيه القحيه


تشكر يا مميز

هههههههه اهلا ابو البر فعلا متل ما حكيت عند القحية اكيد موجودة

لك التحية

موضوعك رائع ....وبصراحة هادا الواقع الحلبي ....

وانا شفت بعيني قصص ابشع من هيك كمان....


وهلا الموضه صايره بحلب بالنسبةللدهب باعتبار سعره مو ثابت انو عبفصلو الدهب بالغرام....!!!!!

والله حكالي واحد راحت امه تخطبله من عند جماعه قالتلا ام البنت في عندي 3 بنات الحلوة الشقرا مهرا مليون والتانية 750 الف واخف وحدة بالحلاوة 500 الف والله حكالي اياها مزبوطة 100 %
هالايام صايرة الشغلة تجارة ....

الله يستر على بناتنا وييسر على شبابا ويحفظن من الحرام .....

ههههههههههه
والله هالكلام صح نوعا ما وخاصه المهر يعني كل وحده مهرا حسب شكلا
حتى بالربف كمان صاير عنا هيك شكلنا انعدينا ...
بس صحي نسيت شغله بالاعذار (والله عملنا استخاره وطلعت ما كويسه)خخخخخخخخخخخخخخ
مشكوووووووور يا فنان